Японтаануу институту 2016-жылы И.Арабаев атындагы Кыргыз мамлекеттик университетинин Окумуштуулар кеңешинин чечими менен түзүлгөн. 2018-жылы институтта орто-кесиптик билим берүү бөлүмү ачылган. Институттун ишинин өзгөчөлүгү – институт япон тилин билген, япон эмгек рыногуна багытталган адистерди даярдайт. Окуу процессинде институттун студенттери япон компанияларында жана уюмдарында практикадан өтүү мүмкүнчүлүгүнө ээ болушат. Японтаануу институтунун студенттеринин спорт маданиятын өнүктүрүүгө өзгөчө маани берилет, студент спортчулар Японияда белгилүү машыктыруучулар менен машыгууга мүмкүнчүлүк алышат. Япон тилин натыйжалуу өздөштүрүү үчүн институтка волонтерлор, япон тилинде сүйлөгөндөр дайыма чакырылып турат.
Ишмердүүлүк мезгилинде институттун материалдык-техникалык базасын өнүктүрүү, натыйжалуу окуу процессин уюштуруу, студенттерди мотивациялоо үчүн жагымдуу шарттарды түзүү үчүн инвестицияларды тартуу боюнча натыйжалуу иштер жүргүзүлдү.
Алдыда дагы көптөгөн милдеттер жана максаттар бар, аларды ишке ашыруу жана жетишүү керек, институтту жаңы сапаттык деңгээлге чыгаруу – япон тилин билген адистерди даярдоо жаатында Кыргыз Республикасынын алдыңкы жогорку кесиптик окуу жайларынын бири болуу.
