КМУда «Билим берүүдөгү инновациялык мамиле: башталгыч мектепте санариптик технологиялардын жана салттык методдордун интеграциясы» эл аралык ИПК өтүүдө

Бүгүн, 4-апрель күнү, И. Арабаев атындагы Кыргыз мамлекеттик университетинде «Билим берүүдөгү инновациялык мамиле: башталгыч мектепте санариптик технологиялардын жана салттык методдордун интеграциясы» аталышында эл аралык илимий-практикалык конференция өз ишин баштады.

Иш-чаранын расмий ачылышында И.Арабаев атындагы КМУнун ректору, профессор Айгүл Абдраева башталгыч билим берүү системасында заманбап педагогикалык ыкмаларды, санариптик технологияларды, инклюзивдүү билим берүүнү, илимий изилдөөлөрдү жана инновацияларды жайылтуу аркылуу билим берүү процесстеринин сапатын жогорулатуу тууралуу ой бөлүштү.

Конференцияга КМУнун ректору Айгүл Абдраева, Илим, эл аралык мамилелер жана инновациялар боюнча проректору Айгүл Чалданбаева, Улуу Британия, Польша, Казакстан, Өзбекстан, Татарстан, Кыргызстан жана башка өлкөлөрдүн окумуштуулары, докторанттары, PhD докторлору, магистранттар, мектептердин директорлору, мугалимдер жана билим берүү эксперттери болуп, 130дан ашуун адам гибриддик форматта катышууда.

Конференциянын жүрүшүндө билим берүү тармагындагы изилдөөчүлөр, педагогдор жана адистер бири-бири менен таанышып, иш-чаралар аркылуу өз ара билим алмашууга мүмкүнчүлүк түзүлдү.

Педагогдордун санариптик технологиялар жаатындагы квалификациясын жогорулатуу зарылчылыгы белгиленип, бул окутууда инновациялык ыкмаларды ийгиликтүү ишке ашыруунун негизги шарты экендиги көрсөтүлдү.

Мындан тышкары, эффективдүү билим берүү платформаларын түзүү жана оюн методдорун киргизүү, айрыкча 12 жылдык билим берүү системасын ишке ашырууда башталгыч класстардын окуучулары үчүн окутууну кызыктуу, жеткиликтүү жана коопсуз кылуу зарылдыгы белгиленди.

Конференция КМУнун Гуманитардык–педагогикалык колледжи тарабынан уюштурулду.