КМУда «Билим берүүдөгү инновациялык мамиле: башталгыч мектепте санариптик технологиялардын жана салттык методдордун интеграциясы» эл аралык ИПК өттү

Бүгүн, 4-апрель күнү, И. Арабаев атындагы Кыргыз мамлекеттик университетинде «Билим берүүдөгү инновациялык мамиле: башталгыч мектепте санариптик технологиялардын жана салттык методдордун интеграциясы» аталышында эл аралык илимий-практикалык конференция өттү.

Иш-чаранын расмий ачылышында И.Арабаев атындагы КМУнун ректору, профессор Айгүл Абдраева башталгыч билим берүү системасында заманбап педагогикалык ыкмаларды, санариптик технологияларды, инклюзивдүү билим берүүнү, илимий изилдөөлөрдү жана инновацияларды жайылтуу аркылуу билим берүү процесстеринин сапатын жогорулатуу тууралуу ой бөлүштү.

Конференцияга КМУнун Илим, эл аралык мамилелер жана инновациялар боюнча проректору Айгүл Чалданбаева, Гуманитардык-педагогикалык колледжинин директорй Токтобүбү Ашымбаева жана КМУнун профессордук-окутуучулар курамы катышты.

Эл аралык илимий-практикалык конференция гибриддик форматта өтүп, ага Улуу Британия, Польша, Казакстан, Өзбекстан, Татарстан, Кыргызстан жана башка өлкөлөрүнүн окумуштуулары, көрүнүктүү педагогдору катышты.

Конференцияга мектептердин директорлору, мугалимдер жана билим берүү эксперттери чакыртылган.

ИПК пленардык жыйын жана төмөнкү беш секциянын ишин камтыды:

Секция 1. Билим берүү процессинин санариптештирилиши: салттык ыкмалар менен жаңы технологиялардын тең салмактуулугу.

Секция 2. Санариптик технологияларды интеграциялоо аркылуу сынчыл ой жүгүртүү жана чыгармачыл жөндөмдөрдү өнүктүрүү.

Секция 3. Интерактивдүү билим берүү платформалары: мугалимдер жана окуучулар үчүн жаңы мүмкүнчүлүктөр.

Секция 4. Оюн технологиялары жана геймификация башталгыч мектепте окутууда.

Секция 5. Билим берүү чөйрөсүндөгү тарбия жана алдын алуу иш-чаралары.

Пленардык жыйында 11 пленардык (анын ичинен 3 онлайн форматта) жана 86 секциялык баяндама угулду.

И. Арабаев атындагы Кыргыз мамлекеттик университетинин 80 жылдык мааракесине арналган «Окутууда инновациялык ыкмалар: башталгыч мектепте санариптик технологиялар менен салттык ыкмаларды интеграциялоо» аталышындагы эл аралык илимий-практикалык конференциясынын жыйынтыктары боюнча резолюция кабыл алынды.

Конференциянын жыйынтыгы боюнча мыкты баяндамачыларга дипломдор тапшырылып, катышуучуларга И.Арабаев атындагы КМУнун «Вестник» илимий журналына жарыялоо жана катышуу тууралуу сертификаттар берилди.