КМУда иш берүүчүлөр менен жолугушуу өттү

Бүгүн, 3-апрель күнү, И.Арабаев атындагы Кыргыз мамлекеттик университетинин Ш.Кадырова атындагы Дүйнөлүк тилдер жана эл аралык мамилелер институтунун Кыргыз-Кытай факультети иш берүүчүлөр менен жолугушуу өткөрдү.

Иш-чарага КРнын Президентине караштуу Мамлекеттик тил жана тил саясаты боюнча улуттук комиссиясынын окуу-маалыматтык жана котормо борборунун директору Карлыгач Жумакадырова, КРнын Билим берүү жана илим министрлигинин мамлекеттик тилди өнүктүрүү секторунун башчысы Аркарбек Мамытов, КРнын Улуттук статистика комитетинин Бишкек шаардык статистика башкармалыгынын жетекчиси Элдос Курушбеков, Кыргыз-Кытай факультетинин Чыгыш таануу жана эл аралык мамилелер кафедрасынын профессордук-окутуучулар курамы жана студенттер катышты.

Иш-чаранын жүрүшүндө келечекте бирге иш алып баруу маселелери, магистранттар жана студенттерге практика өтүү мүмкүнчүлүктөрүн түзүү, студенттер, магистранттар жана окутуучулар үчүн семинар уюштуруу боюнча маселелер талкууланды.

Жолугушуунун негизги максаты: студенттерге иш берүүчүлөр менен тыгыз байланыш түзүү жана тажрыйба алмашууга шарт түзүү.