КМУнун профессордук-окутуучулар курамы Талас мамлекеттик университетинде конок-лекцияларды өттү

И. Арабаев атындагы Кыргыз мамлекеттик университетинин профессордук-окутуучулар курамы академиялык мобилдүүлүктүн алкагында Талас мамлекеттик университетинде конок-лекция өтүштү.

М.Р.Рахимова атындагы Кошумча кесиптик билим берүү институтунун Табигый-математикалык билимдер кафедрасынын доценти, педагогика илимдеринин кандидаты Гүлнара Усенгазиева - “Учурдагы үзгүлтүксүз экологиялык билим берүү”, Физика-математика факультетинин деканы, техника илимдеринин кандидаты, доцент Гүлзат Токонбекова - “Физика сабагында экологияны байланыштырып окутуу”, Педагогикалык жана гуманитардык билимдер кафедрасынын доцентинин милдетин аткаруучу, тарых илимдеринин кандидаты Назгүл Рысмендеева - “Чүкө феномени: салттуу жана заманбап аспектилери” аталышында конок-лекцияларды өтүштү. Конок-лекциялардын жүрүшүндө ТалМУнун студенттери жана окутуучулары заманбап педагогикалык ыкмаларды салттуу баалуулуктар менен айкалыштыруу жолдору жөнүндө маалымат алышты.

Лекциялар кызыктуу суроо-жооптор менен коштолуп, Талас мамлекеттик университетинин ректору, техника илимдеринин доктору Жыргалбек Шаршембиев конокторго ыраазычылык каттарын тапшырды.

Мындай кызматташтык эки университеттин ортосунда билим берүү жана илимий байланыштарды бекемдөөдө жаңы мүмкүнчүлүктөрдү түздү.